Ժիրայր Սեֆիլյանի գործով դատական նիստին այսօր՝ սեպտեմբերի 22-ին, վկաների հարցաքննությունը շարունակվել է։ Գործով վկա Սահակ Սահակյանը պատմել է, որ գործով ամբաստանյալներից միայն ճանաչել է Հովհաննես Պետրոսյանին, որն էլ խնդրել է մի փաթեթ պահել իր ավտոտնակում։ Վկան պնդել է, թե տեղյակ չի եղել՝ ինչ է փաթեթի մեջ, քննչական մարմնում առերեսման ժամանակ է տեղեկացել, որ այն զենք է եղել։
Գործով մեկ այլ վկա՝ Վիգեն Թոփչյանը, որը Լիբանանից Հայաստան է ներգաղթել 2013 թվականին, ասել է, որ Սեֆիլյանի հիմնադրած «Նախախորհրդարան»-ի անդամների հետ ծանոթացել է ընկերներ ձեռք բերելու նպատակով։ Ասել է, որ ընկերացել է նախ «Նախախորհրդարան»-ի ֆեյսբուքյան էջով, որից հետո մեկ անգամ հանդիպել է կարճ ժամանակով շփվել:
Ասել է, որ Սեֆիլյանի հերոսական կերպարով մշտապես հիացել է, սակայն երբ համացանցով ու լրատվամիջոցներով տեղեկացել է, որ «նրանք անհնազանդության կոչեր են անում», հիասթափվել է եւ դադարեցրել շփումները։ Նա նշել է, որ մեկ անգամ էլ իրեն նամակով տեղեկացրել են հանրահավաքի մասին՝ հորդորելով իր հետ բերել ընկերներին, սակայն վերջինս հրաժարվել է մասնակցել։