Հայ ժողովրդին ուղղակի խաբում են, երբ երկրում ինչ-որ արտասահմանյան ներդրումների մասին են խոսում: Սեպտեմբերի 22-ին լրագրողների հետ հանդիպման ժամանակ այսպիսի կարծիք հայտնեց տնտեսագետ Վիլեն Խաչատրյանը:
Նրա խոսքով՝ հունվար-հունիսին ոչ միայն ներդրումներ չեն եղել, այլեւ երկրից է դուրս բերվել 24,8 մլրդ դրամ: «Այսինքն՝ սա նշանակում է, որ Հայաստանից ավելի շատ դրամական միջոցներ են հանվել, քան բերվել դրսից: Հայաստան ամենաշատ միջոցներն ստացվել են Ջերսի օֆշորներից: Այնտեղից ստացվել է 31,6 մլրդ դրամ: Հայաստանում ներդրումների ծավալով երկրորդը Կիպրոսն է՝ 6,6 մլրդ դրամ»,- պարզաբանեց փորձագետը՝ հավելելով, որ ամենաշատ դրամական միջոցները Ռուսաստան են տարվել: Խաչատրյանի խոսքով՝ անցյալ տարի այնտեղ է տարվել 27 մլրդ դրամ, իսկ 2017-ին՝ արդեն 25 մլրդ դրամ: Ըստ փորձագետի՝ երկրորդ երկիրը, որտեղ Հայաստանից ամենաշատն են դրամական միջոցներ տարել Լիբանանն է: Այնտեղ է տարվել 12,5 մլրդ դրամ: