Թուրքիայի վարչապետ Ռեջեփ Թայիփ Էրդողանը հեղաշրջման անհաջող փորձից հետո Ռուսաստանի կողմ թեքվեց: Այս մասին սեպտեմբերի 22-ին՝ լրագրողների հետ հանդիպման ժամանակ, հայտարարել է Թուրքիայի խորհրդարանի Ժողովուրդների դեմոկրատական կուսակցության պատգամավոր Կարո Փայլլանը:
Խոսելով Թուրքիայի՝ Եվրասիական տնտեսական միությանը միանալու հեռանկարից՝ նա նշել է, որ մինչեւ վերջերս Անկարան հակվում էր դեպի Արեւմուտք եւ ժողովրդավարությանը հասնելու քայլեր էր կատարում։
«Հեղաշրջման փորձից հետո Էրդողանը թեքվեց Ռուսաստանի կողմ, քանի որ Արեւմուտքը պաշտպանում է քրդերին։ Ռուսաստանը եւ ԱՄՆ-ը խաղ կսկսեն թուրքերի եւ քրդերի հետ»,-ասել է Փայլանը։
Հիշեցնենք, որ Թուրքիայի Էկոնոմիկայի նախարար Նիհաթ Զեյբեքչին հայտարարել էր․«Մենք առաջարկում ենք, որ Թուրքիան Եվրասիական տնտեսական միության հետ բանակցություններ սկսի մաքսային համաձայնագրի կնքման հարցով։ Չխախտելով ԵՄ-ի հետ համապատասխան համաձայնագիրը՝ Թուրքիան ցանկանում է բարելավել համագործակցությունը ԵՏՄ-ի հետ»: