Քարվաճառում 2016թ. ապրիլի 5-ի լույս 6-ի գիշերը երկու հայ զինծառայողներից մեկի մահվան գործով նախաքննությունը շարունակվում է:
NEWS.am-ի տեղեկություններով, իրավապահները մինչեւ այժմ չեն կարողանում պարզել զինծառայող Սուրեն Արամյանի մահվան հանգամանքները: Նշենք, որ նախկինում նրա մահվան մեջ մեղադրվում էր Դավիթ Դումիկյանը, որը ներկայումս մահացած զինծառայողներից Գրիգոր Ավետիսյանի գործով ամբաստանյալն է: Օրերս Դումիկյանը կրկին հարցաքննվել է Արամյանի մահվան դեպքով հարուցված քրեական գործի շրջանակում:
Հետաքրքիր է, որ նույն վայրում տեղի ունեցած երկու մահվան դեպքերով հարուցված քրգործերն առանձնացվել են: Ի դեպ, Գրիգոր Ավետիսյանի սպանության գործն արդեն դատարանում է, Դավիթ Դումիկյանն իրեն առաջադրված մեղադրանքը չի ընդունում:
Տեղեկություններ կան, որ ապրիլյան պատերազմի օրերին Քարվաճառի դիրքերից մեկում տեղի ունեցած ողբերգության պատճառն այն է եղել, որ կողմերը փորձել են «ամրապնդել իրենց դիրքը» զորամասում:
