Ոստիկանության կենտրոնական բաժին են բերման ենթարկել 24-ամյա Ալվարդ Ոսկանյանը եւ 27-ամյա Կարինե Մադաթյանը: Նրանք կասկածվում են դանակահարության մեջ:
Shamshyan.com-ի փոխանցմամբ՝ Կարինե Մադաթյանը Դիլիջանի բնակիչ է, իսկ Ալվարդ Ոսկանյանը՝ Երեւանի Ավան վարչական շրջանի: Վերջինները կասկածվում են սեպտեմբերի 22-ին Մաշտոցի պողոտայի թիվ 15 շենքին հարակից այգում վիճաբանություն ունենալու մեջ, իսկ Ա. Ոսկանյանը կասկածվում է իրենց այդ պահին նկատողություն արած Երեւանի բնակիչ, 49-ամյա Կարեն Գրիգորյանին դանակահարելու մեջ:
Ոստիկանները պարզել են, որ վիրավորը Երեւանի Լեոյի փողոցի բնակիչ է: Նա հիվանդանոց է տեղափոխվել Մաշտոցի պողոտայի թիվ 15 շենքին հարակից այգուց։
Կարեն Գրիգորյանն աշխատում է «Գազպրոմ Արմենիա»-ում, «Երեւան Գազ»-ի Մալաթիա-Սեբաստիա մասնաճյուղի ծառայության գծով պետի տեղակալն է: Նա այգում նկատել էր, որ երկու կանայք վիճաբանում են, եւ միջամտել էր, որի արդյունքում էլ դանակի հարված էր ստացել:
