Իրաքյան Քուրդիստանի անկախության հանրաքվեի առցանց քվեարկությունը սկսվել է, հայտնում է «ՌԻԱ Նովոստի»-ն՝ վկայակոչելով Քուրդիստանի Բարձրագույն անկախ ընտրական հանձնաժողովին:
Քվեարկությունը կազմակերպվել է արտասահմանում բնակվող Իրաքի քաղաքացիների համար, որոնք Իրաքյան Քուրդիստանի կամ «Քուրդիստանի սահմաններից դուրս գտնվող քրդական շրջանների» ռեզիդենտի կարգավիճակ ունեն:
Էլեկտրոնային քվեարկությունը սկսվել է հանձնաժողովի հատուկ ստեղծած e-voting.krd կայքում: Քվեարկել կարելի է միայն կայքում գրանցվելուց հետո, որի ընթացքում պետք է հաստատել իրաքյան քաղաքացիությունը եւ մնացյալ չափանիշները: Չնայած քվեարկությունն արդեն սկսվել է, գրանցումը դեռեւս շարունակվում է: Սրա հետ կապված հանձնաժողովից դժվարացել են հայտնել, թե քանի քաղաքացի է գրանցվել առցանց քվեարկելու համար:
Առաջինը քվեարկել է արդեն 15 տարի Չինաստանում բնակվող քրդական ծագմամբ գործարար Սաբոր Հայդար Բազարը:
Համացանցում նա պատմել է, որ վաղուց է գրանցվել կայքում եւ հատուկ սպասում էր քվեարկությունը սկսվելուն, որպեսզի առաջիններից մեկը քվեարկի, եւ հիմա ոգեւորված է, որ դա արդեն կատարել է: Նա այս նորությունն ակտիվորեն քննարկում է քուրդ ընկերների հետ, որոնք բնակվում են ամբողջ աշխարհում, եւ հարցազրույցներ է տալիս քրդական լրատվամիջոցներին:
Սեպտեմբերի 25-ին Քուրդիստանում նախատեսված է անկախության հանրաքվեի անցկացումը, որին կտրականապես դեմ են Բաղդադը եւ աշխարհի շատ երկրներ: Թեհրանն ավելի վաղ հայտարարել է, որ հանրաքվեի անցկացման եւ քրդերի անջատման հետեւանքով Իրաքի հետ անվտանգության հարցով բոլոր համաձայնագրերն ավտոմատ չեղյալ կհամարվեն եւ կհանգեցնեն շրջանի հետ սահմանները փակելուն:
