Ուռուցքաբանության ազգային կենտրոնում 2015թ. մարտի 12-ին 61-ամյա Սվետլանա Պետրոսյանի մահվան դեպքով հարուցված քրեական գործը կարճելու վերաբերյալ որոշումը տուժող կողմը բողոքարկել է: Այս մասին NEWS.am-ին ասաց տուժողի իրավահաջորդի ներկայացուցիչ Արայիկ Պապիկյանը:
»Դատարան ենք դիմել, նշանակված երկու նիստերը հետաձգվել են, հիմա սպասում ենք առաջիկա նիստին»,- ասաց փաստաբանը:
Նշենք, որ մահացած կնոջ հարազատները կատարվածում մեղադրում են հիվանդանոցի բժիշկներին, սակայն նախաքննական մարմինը պարզել է, որ բժիշկների գործողություններում սխալ չկա եւ այդ հիմքով քրգործը կարճել է:
Ավելի վաղ հաղորդել էինք, որ 61-ամյա Սվետլանա Պետրոսյանի մոտ 2015թ. հունվարի 12-ին հայտնաբերվել էր կրծքագեղձի քաղցկեղ: Ուռուցքաբանության ազգային կենտրոնում կինը մարտի 2-ին քիմիաթերապիա էր ընդունել: Մահացածի որդին պնդում է, որ մայրն առանց լյարդի պատշաճ հետազոտության է ենթարկվել քիմիաթերապիայի, ինչի հետեւանքով լյարդային անբավարարության պատճառով 10 օր անց՝ մարտի 12-ին անց մահացել է:
Դեպքի առթիվ հարուցվել էր քրեական գործ Քրեական օրենսգրքի 130-րդ հոդվածի հատկանիշներով:
