Հայաստանում նախագծում են ինքնակառավարվող մեքենաների համար նախատեսված չիպերի բաղադրիչներ։ Synopsys ամերիկյան ընկերության գլխավոր ճարտարապետ, դրա դուստր ընկերության՝ Synopsys Armenia-ի նախագահ Երվանդ Զորյանը NEWS.am-ի թղթակցին հայտնել է, որ ընկերության հայ ինժեներներն արդեն մշակում են այդպիսի չիպերի բաղադրիչների դիզայնը, ինչպես նաեւ համակարգեր` այդ մասնիկների ինքնաշխատ տեստերի համար։
«Մենք աշխատում ենք ոչ թե ուղիղ ավտոկոնցեռնների՝ այլ մեքենաների հսկողության համակարգերի մատակարարների հետ։ Մասնավորապես աշխատում ենք Bosch-ի՝ ավտոմեքենաների համար էլեկտրոնիկայի խոշորագույն մատակարարներից մեկի հետ,- նկատեց Զորյանը Երեւանում ԳԱԱ-ում «Հաշվողական գիտություններ ու տեղեկատվական տեխնոլոգիաներ- 2017» համաժողովի ընթացքում։
Այն հայտարարությունները, որ մեքենաների ասպարեզում արհեստական ինտելեկտը զգալիորեն կուժեղանա, ոչ թե ավտոկոնցեռնների բլեֆն է, այլ ճշմարտություն, համարում է Զորյանը։
Նրա խոսքով՝ AI-ը մեքենաներում հիմա գտնվում է երեք փուլերից առաջինում ։ Հիմա վարորդի ոտքերն ու ձեռքերն են ազատվել, բայց ոչ աչքերը՝ նա պետք է ինքնուրույն հետեւի երթուղուն։ Նման մեքենաներ արդեն արտադրվում են։
Երկրորդ փուլն է վարորդի աչքերն ազատելը։ Այսինքն հնարավոր կլինի ղեկի մոտ առհասարակ չնստել, այլ թերթ կարդալ կամ զրուցել ընկերոջ հետ (բայց մեքենայում այնուեամենայնիվ պետք է գտնվի ինչ-որ մեկը)։ Եվ վերջապես, երրորդ աստիճանը՝ հեռակա հսկողությունն է։
«Առաջին՝ առանց «ձեռքերի ու ոտքերի» փուլն արդեն իրականություն է դարձել։ Հայաստանի մասնագետները նույնպես մասնակցություն ունեն դրա իրականացմանը»,- նկատեց Զորյանը։