ՀՀ նախագահ Սերժ Սարգսյանն այսօր՝ սեպտեմբերի 26-ին, ընդունել է Ռուսաստանի առողջապահության նախարար Վերոնիկա Սկվորցովային, ով Հայաստան է ժամանել մասնակցելու Հայ-ռուսական առողջապահական երրորդ համաժողովին:
Նախագահի մամուլի գրասենյակից NEWS.am-ին հայտնում են, որ ՀՀ նախագահը ողջունել է հյուրին եւ կարեւորել արդեն ավանդական դարձած առողջապահական համաժողովի անցկացումը, որը, նախագահի համոզմամբ, շատ լավ հարթակ է երկու երկրների պետական ու մասնավոր առողջապահական կազմակերպությունների միջեւ փոխգործակցության զարգացման, ոլորտի արդիական հարցերի շուրջ մասնագիտական քննարկումների եւ փորձի փոխանակման համար:
«Առողջապահության ոլորտի մարտահրավերները ժամանակակից աշխարհում ամենասուր մարտահրավերներից են եւ դուրս են առանձին պետությունների առողջապահական համակարգերի սահմաններից: Այդ բարդ խնդիրներն առնչվում են սոցիալ-տնտեսական կյանքի գրեթե բոլոր ոլորտներին: Այդ իսկ պատճառով նման մասնագիտական քննարկումները եւ փորձի փոխանակումը կարող են միայն օգտակար լինել»,- ասել է Սերժ Սարգսյանը:
Հանրապետության նախագահը ասվածի համատեքստում կարեւորել է Հայ-ռուսական առողջապահական երրորդ համաժողովի օրակարգում ներառված հարցերը, այդ թվում՝ առողջապահության ոլորտի բարեփոխումների, ԵՏՄ շրջանակներում ոլորտի ինտեգրացիոն գործընթացների հետ կապված: Սերժ Սարգսյանը հաջողություն է մաղթել համաժողովի աշխատանքներին:
ՌԴ առողջապահության նախարարը շնորհակալություն է հայտնել Երեւանում առողջապահական համաժողովի հրաշալի կազմակերպման համար եւ ընդգծել, որ ձեւավորված արդյունավետ համագործակցությունը թույլ է տալիս արդեն իսկ արձանագրել համատեղ աշխատանքի որոշակի արդյունքներ, որոնց անդրադարձ կկատարվի հերթական՝ երրորդ համաժողովի ժամանակ:
Վերոնիկա Սկվորցովան իր տպավորություններն է ներկայացրել ՀՀ ԱՆ Ռ. Յոլյանի անվան արդիականացված արյունաբանական կենտրոն այցելությունից: Նա գոհունակությամբ է նշել, որ ՀՀ առաջին տիկնոջ մեծ ջանքերի եւ նախաձեռնության շնորհիվ ստեղծված նոր բաժանմունքի եւ լաբորատորիայի հիմնման, կադրերի պատրաստման ու նորագույն տեխնոլոգիաների ներդրման գործում իրենց մասնակցությունն են ունեցել նաեւ ռուսաստանյան առաջատար առողջապահական կենտրոնները:
ՌԴ առողջապահության նախարարը սերտ համագործակցությամբ առանձնացող ընթացիկ տարին խորհրդանշական է համարել, քանի որ Հայաստանը եւ Ռուսաստանը այս տարի նշում են դիվանագիտական հարաբերությունների հաստատման 25-րդ եւ Բարեկամության, համագործակցության եւ փոխադարձ օգնության պայմանագրի 20-րդ հոբելյանները:
Հանդիպմանը նախարար Սկվորցովան Հանրապետության նախագահին ներկայացրել է ՌԴ առողջապահական համակարգի զարգացման առաջնահերթ ուղղություններն ու ծրագրերը, խոսել նաեւ Հայաստանի հետ համագործակցության նոր ուղղությունների, փորձի փոխանակման հնարավորությունների մասին, որոնց շուրջ հայ գործընկերոջ հետ երեւանյան համաժողովի շրջանակներում որոշակի պայմանավորվածություններ են ձեռք բերվել:
