Հայաստանը Ախուրյանի ջրամբարի շահագործման հետ կապված Թուրքիային ներկայացվող պահանջներ կձեւակերպի: Այս մասին սեպտեմբերի 26-ին մամուլի ասուլիսի ժամանակ ասաց բնապահպանության նախարար Արծվիկ Մինասյանը:
Նախարարի խոսքով՝ որպեսզի ջրամբարը չչորանա, այն պետք է համաձայնեցված օգտագործել: Եթե թուրքական ափում այն նորմայից ավելի են բացում, հայկական կողմը չպետք է անտարբեր մնա: Նախարարությունն աշխատանքային խումբ է ստեղծել,որը կշարադրի ջրամբարի շահագործման տեխնիկական պահանջները եւ այն թուրքական կողմին կներկայացնի:
Մինասյանը նշեց, որ Անկարան խուսափում է Երեւանի հետ նույնիսկ բնության պահպանության ոլորտում համագործակցելուց: Նա չի մասնակցել երեք երկրների ընդհանուր սահմանի մոտ ընկած տարածքի պահպանության համատեղ նախագծին, որտեղ պահպանվում է Հայաստանի հյուսիսում Արփի լիճը եւ վրացական կողմից՝ Ջավախքի լանդշաֆտը: Միայն Հայաստանը եւ Վրաստանն են միասին աշխատում, քանի որ Թուրքիան քաղաքականությունը գերադասել է բնապահպանական սեփական շահերից: Սակայն 2 երկրների նախարարները որոշել են միացյալ հարթակ ստեղծել, որպեսզի ներգրավեն նաեւ թուրքական կողմին: