Քրդական գործոնը կարող է խթան հանդիսանալ հայ-թուրքական երկխոսության վերսկսման համար: Այս մասին սեպտեմբերի 26-ին՝ լրագրողների հետ հանդիպման ժամանակ, ասել է Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը:
Անդրադառնալով Հայաստանի նախագահ Սերժ Սարգսյանի՝ ՄԱԿ-ում հայ-թուրքական արձանագրություններն անվավեր ճանաչելու հավանականության մասին արված հայտարարությանը, եթե մինչեւ 2018 թվականի գարնանը Թուրքիան չվավերացնի դրանք՝ փորձագետը նշել է, որ դա պարզապես գործընթացի մասին հիշեցում էր Թուրքիայի համար:
«Պաշտոնական Երեւանի համար իմաստ չունի առաջ ընկնել քրդական հարցում: Եվ այս տեսանկյունից կարճաժամկետ հեռանկարում Թուրքիայի հետ երկխոսության հնարավորւթյուն է ստեղծվում: Չեմ կարծում, որ Սերժ Սարգսյանն այս հայտարարությամբ Թուրքիայի հետ երկխոսության վրա մեծ քար է նետել: Սա նաեւ փորձ էր նոր գործընթացների համատեքստում վերականգնելու երկկողմ միջպետական հարաբերությունների նկատմամբ ուշադրությունը», - ասել է Մեհրաբյանը:
Հիշեցնենք, որ Իրաքի Քուրդիստանի հանրաքվեի մասնակիցների ավելի քան 93 տոկոսը քվեարկել է անկախության օգտին:
