«Սասնա ծռեր» խմբի գործով հերթական դատական նիստին պաշտպանները յուրահատուկ բողոքի ակցիա են կազմակերպել:
NEWS.am-ի թղթակիցը դատարանից հայտնում է, որ փաստաբանները դատարան են եկել նիստը նախագահող դատավոր Արտուշ Գաբրիելյանի լուսանկարով շապիկներով, որոնց վրա գրված է «Մի բռնաբարեք իրավունքը», «Ազատություն Արտուշ Գաբրիելյանին»: Փաստաբաններից Լուսինե Սահակյանն իր շապիկը տվեց մեղադրող Պետրոս Պետրոսյանին: Վերջինս լուռ վերցրեց այն:
Մեզ հետ զրույցում Լուսինե Սահակյանը նշեց, որ ինքը շապիկը տվել է Պետրոս Պետրոսյանին, քանի որ նա ցանկություն է հայտնել նման շապիկ կրել:
«Դատախազն ինձ ասաց, որ ցանկանում է այդ շապիկից կրել, մենք էլ քանի որ այլ շապիկ չունեինք, իմը հանեցի եւ նվիրեցի նրան»,- ասաց Լուսինե Սահակյանը:
Պաշտպաններն այսօր եւս չկարողացան առանց խուզարկության մուտք գործել դատարանի շենք: Նրանցից շատերի պայուսակների զննության ժամանակ ազդանշան հնչեց եւ նրանք հրաժարվեցին բացել այն եւ մտնել շենք:
Չնայած որ դատական նիստը պետք է սկսվեր ժամը 11:00-ին, սակայն Արտուշ Գաբրիելյանը, առանց նիստերի դահլիճ գալու, նիստը հետաձգեց:
«Երեւի նա լսել էր, որ նման ակցիա է կազմակերպվելու, այդ պատճառով էլ նիստերի դահլիճ չեկավ: Թե ինչու ենք շապիկների վրա գրել «Ազատություն Արտուշ Գաբրիելյանին», պարզ է, որովհետեւ այս գործում ինքն իր ցանկությամբ չի հայտնվել»,- լրագրողների հետ զրույցում ասաց Լուսինե Սահակյանը:
