«Սասնա ծռեր» խմբի գործը քննող դատավոր Արտուշ Գաբրիելյանը հրաժարվել է այս գործը քննելուց, սակայն, նա ընտրել է ոչ թե ինքնաբացարկի տարբերակը, այլ` գործից մաս անջատելու: Այս մասին այսօր` սեպտեմբերի 28-ին, լրագրողների հետ զրույցում ասաց այս գործով պաշտպան Երվանդ Վարոսյանը:
«Տպավորությունն այսպիսին է` իրենց համար կարեւորություն ունեցող ամբաստանյալների մասն անջատվել եւ մեկ այլ դատավորի է հանձնվել, իսկ մնացածի մասով գործը Արտուշ Գաբրիելյանին կմնա»-ասաց նա:
Երվանդ Վարոսյանը նշեց, որ այս որոշմամբ, գործի քննության որակը տուժելու է, որովհետեւ ամբաստանյալներին տարբեր գործերի վարույթում տարանջատելն արդարադատության շահերից չի բխում եւ խոչընդոտ է հանդիսանալու գործի քննությանը:
Հիշեցնենք, որ «Սասնա ծռեր» խմբի 18 անդամի գործն այսօր կիսվեց. Ըստ լուրերի` այս գործով քննությունն իրականացնելու է Երեւանի Կենտրոն եւ նորք-Մարաշ վարչական շրջանների ընդհանուր իրավասության դատավոր Մեսրոպ Մակյանը, որը 6 ամիս ժամանակով Կենտրոնի դատարանից ուղարկվել է էրեբունու դատարան: