Ճապոնական ավտոկորպորացիաներ Toyota Motor-ը եւ Mazda Motor-ը, ինչպես նաեւ ճապոնական ավտոպահեստամասերի խոշոր արտադրող Denso-ն էլեկտրաշարժիչներով ավտոմեքենաների մշակման համատեղ պայմանագիր են ստորագրել, փոխանցում է ՏԱՍՍ-ը: Այս մասին նշված է հրապարակված մամուլի հաղորդագրության մեջ:
Mazda-ն, Denso-ն եւ Toyota-ն ընկերություն կստեղծեն՝ «որպես մշակումների համատեղ կենտրոն», որի մեջ կմտնեն ընտրված ինժեներներ:
«Համաձայնագիրը մոդելների լայն սպեկտր է ընդգրկում՝ փոքր դասից մինչեւ ուղեւորատար ավտոմեքենաներ, ամենագնացներ, թեթեւ բեռնատարներ, եւ ուղղված է ինովացիոն գործընթացի մշակմանը՝ յուրաքանչյուր ընկերության ուժեղ կողմերի միավորմամբ, այդ թվում՝ Mazda-ի արդյունավետ ծրագրման, Denso-ի համակարգչային մոդելավորման վարպետության եւ Toyota ընկերության New Global Architecture (TNGA) հարթակի»,- նշված է հաղորդագրության մեջ:
Ընկերությունները նաեւ թիրախավորել են բիզնես կառուցվածքի ստեղծումը, որը բաց կլինի այլ շահագրգիռ ավտոարտադրողների եւ մատակարարների համար:
