Երեւանի Մյասնիկյան պողոտայում՝ «Բելաջիո» ռեստորանի դիմաց, այսօր՝ սեպտեմբերի 28-ին, տրոլեյբուսի վթարի հետեւանքով տուժածներից 4-ի վիճակն այս պահին գնահատվում է կայուն ծանր: Այս մասին լրագրողների հետ զրույցում ասաց «Հերացի» թիվ 1 համալսարանական հիվանդանոցային համալիրի տնօրեն Արեն Բաբլումյանը:
«Մյուս երկուսի՝ 21 եւ 29-ամյա երիտասարդների վիճակը գնահատվում է բավարար, նրանք քերծվածքներ են ստացել եւ այսօր ավելի ուշ դուրս կգրվեն: Ինչ վերաբերում է ծանր վիճակում գտնվողներին, նրանք բոլորն էլ միջին տարիքի քաղաքացիներ են՝ 3 կին եւ 1 տղամարդ: Հատկապես ծանր է 48-ամյա մի տղամարդու վիճակը, նա ստացել է բազմաթիվ կոտրվածքներ»,- ասաց Արեն Բաբլումյանը:
Նա հայտնեց, որ բոլոր վիրավորները գտնվում են վերակենդանացման բաժանմունքում: Ուղեւորների կյանքին, ըստ Բաբլումյանի, վտանգ չի սպառնում:
Նշենք, որ վթարից տուժած 3 անձ էլ գտնվում է «Սուրբ Գրիգոր Լուսավորիչ» բժշկական կենտրոնում:
Հիշեցնենք, որ ըստ Երեւանի քաղաքապետարանի տրանսպորտի վարչության պետ Հենրիկ Նավասարդյանի՝ վթարի պահին վարորդը ղեկին չի եղել: Նրա խոսքով, ընթացքի ժամանակ տրոլեյբուսի պոզերը (շտանգաներ) պոկվել են, վարորդն իջել է, որ դրանք տեղը դնի ու այդ ժամանակ կարճ միացման նման մի բան է եղել, որ հնարավոր չի եղել պոզերը տեղաշարժել. «Մեքենան փորձել է մի քիչ առաջ տանի, որպեսզի պոկվի հաղորդալարից եւ կարողանա շարունակել իր աշխատանքը: Այդ ընթացքում, որպեսզի կարողանա մեքենան առաջ տանել, ձեռքի արգելակը, որ մինչ այդ կանգնացրած է եղել, ըստ իր վարկածի, իջեցրել է, որ կարողանա առաջ տալ: Էդ իջեցնելու պահին, քանի որ թեքության վրա է եղել, վարորդի անփութության պատճառով, մեքենան սկսել է շարժվել: Էլ վարորդը չի հասցրել նստի ղեկին, որ արգելակի»: