Թուրք հասարակական-քաղաքական եւ մշակութային գործիչների պատվիրակության անդամները, որոնք այցելել են Լեռնային Ղարաբաղ, մտցվել են Ադրբեջանի ԱԳՆ «սեւ ցուցակի» մեջ: Այս մասին հայտնում է haqqin.az-ը:
Ադրբեջանի ԱԳՆ պաշտոնական ներկայացուցիչ Հիքմեթ Հաջիեւը հայտնել է, որ «սա որոշ թուրք քաղաքացիների անձնական սադրիչ ակցիա էր՝ Թուրքիայի հայկական լոբբիի հովանավորությամբ, եւ նրանք բոլորն արդեն մտցվել են ԱԳՆ «սեւ ցուցակի» մեջ: Իսկ Թուրքիայի ԱԳՆ-ից կայքին հայտնել են, որ թուրք քաղաքացիների Լեռնային Ղարաբաղ այցի կապակցությամբ արդեն քննություն է սկսվել:
Պարբերականին հաջողվել է խոսել նաեւ պատվիրակության ղեկավար, «Անկարայի մտածողության հարթակ» հասարակական կազմակերպության նախագահ, խորհրդարանի նախկին պատգամավոր Ուֆուք Ուրազի հետ, որը հայտարարել է, որ մինչեւ Երեւան այցելելը ինքը զանգահարել է Բաքվում Թուրքիայի դեսպանատուն եւ զգուշացրել, որ մտադիր է Ղարաբաղ այցելել: «Կոնկրետ պատասխան չստանալով՝ ես Ղարաբաղ ուղեւորվեցի»,- պարզաբանել է Ուրազը: Թուրք գործիչը հայտարարել է, որ մեկ անգամ եւս համոզվել է, որ «եւ՛ մենք, եւ՛ ադրբեջանցիները, եւ՛ հայերը երկխոսության պակաս ունենք, մենք պետք է մշտապես շփվենք, որ ինչ-որ եզրակացության գանք»: Իսկ Ադրբեջանին Լեռնային Ղարաբաղի պատկանելության մասին թուրք գործիչը վերամբարձ ոճով հայտարարել է, որ չարժի այս հարցն այդքան ուղղակի դնել: «Ղարաբաղը ադրբեջանցիների եւ հայերի ընդհանուր տարածքն է, եւ նրանք այնտեղ պետք է համատեղ ապրեն»,- ասել է նա: Ինչ վերաբերում է ղարաբաղյան հիմնախնդրի վերաբերյալ Թուրքիայի դիրքորոշմանը, ապա նա կարծում է, որ ավելի լավ է այս հակամարտությանը չմիջամտեն ո՛չ Անկարան, ո՛ր որեւէ այլ երկիր, քանի որ, նրա համոզմամբ, ադրբեջանցիները եւ հայերը իրենք ընդհանուր լեզու կգտնեն:
