Ժիրայր Սեֆիլյանի եւ մյուսների գործով դատական նիստին այսօր՝ սեպտեմբերի 29-ին, Երեւանի Շենգավիթ վարչական շրջանի ընդհանուր իրավասության դատարանում միջադեպ գրանցվեց ամբաստանյալ Ներսես Պողոսյանի եւ մեղադրող Պետրոս Պետրոսյանի միջեւ: NEWS.am-ի թղթակիցը դատարանից հաղորդում է, որ Ներսես Պղոսյանի խափանման միջոց կալանքը փոխելու մասին նրա շահերի պաշտպան Արայիկ Պապիկյանի միջնորդության քննության ժամանակ մեղադրող Պետրոս Պետրոսյանը հայտնեց, որ գործի քննության ընթացքում առկա են եղել և պահպանվել են ամբաստանյալի կողմից գործի քննությունից թաքնվելու հիմքեր, նաև գործի քննությանը խոչընդոտելու վերաբերյալ:
Երբ Տաթեւիկ Գրիգորյանն ընթերցեց միջնորդությունը մերժելու մասին որոշումը, Ներսես Պողոսյանը հայտարարությամբ հանդես գալու իրավունք խնդրեց:
«Դուք հնարավոր է փախնեք՝ թողնելով ձեր մամային անկողնային վիճակում, ձեր երեք երեխաներին էդ վիճակում, բայց ես ու իմ շրջապատում նման մարդիկ չկան: Պարոն գլխավոր դատախազին կփոխանցեք, որ ես անժամկետ հացադուլ եմ հայտարարում եւ այս անգամ իր կուտը չեմ ուտի, հենց այդպես էլ Արթուրին կփոխանցեք, պարոն մեղադրող դատախազ»,-ասաց Ներսես Պողոսյանը՝ դիմելով դատախազին:
Մեղադրողն ամբողջ ընթացքում լուռ լսում էր Ներսես Պողոսյանի հայտարարությունը, սակայն, երբ Տաթեւիկ Գրիգորյանը նիստը հետաձգելու վերաբերյալ որոշում էր կայացնում, Պետրոս Պետրոսյանը դիմեց Ներսես Պողոսյանին. «Արա, բան ունես ասելու, կայնի ասա»: Դատավոր Տաթեւիկ Գրիգորյանը դատախազի նկատմամբ դատական սանկցիա կիրառեց նախազգուշացման տեսքով եւ հետաձգեց նիստը մեկ շաբաթով:
Նշենք, որ դատախազից շենքի բակում հավաքվածները փորձեցին պարզաբանում ստանալ, թե ինչու է Ներսես Պողոսյանին դիմել «արա»-ով, նա ձայն չհանեց, մյուս դատախազն էլ վստահեցրեց, որ իր գործընկերը այդ բառը չի օգտագործել: Մինչդեռ դատավարության մասնակիցները լսել էին Պետրոս Պետրոյանի «արա»-ով դիմելաձեւը: