Ժիրայր Սեֆիլյանի եւ մյուսների գործով հերթական դատական նիստին այսօր` սեպտեմբերի 29-ին, շարունակվեց վկաների հարցաքննությունը:
Վկաներից Սերգեյ Գրիգորյանը հայտնեց, որ ինքն ամբաստանյալներից ճանաչում է միայն Ժիրայր Սեֆիլյանին:
«Հարցաքննվել եմ երկու տարի առաջ, ցուցմունքիս կեսը հիշում եմ, կեսը չեմ հիշում... էնտեղ եմ եղել, եկել են ինչ որ մարդիկ, հետո մեզ տարել են քննչական»,- ասաց վկան` նշելով, որ ավելացնելու բան չունի:
Մեղադրող Պետրոս Պետրոսյանի հարցին` ինչ վայրի մասին է խոսքը, վկան նշեց, որ չի հիշում. «Կվարտիրա էր էլի... գրասենյակ էր ինչ-որ, երեւի Հիմնադիր խորհրդարանի գրասենյակն էր: Ես գնացել էի, որ գիշերը մնայի, հաջորդ օրն ուրիշ տեղ շինարարական գործ անեի... երկու տարի անցել ա, չեմ հիշում էլ: Ես ու իմ համագյուղացի Հովհաննես Մինասյանն էինք այնտեղ, մի մարդ էլ կար, նստած էր ուղղակի... ես մնացել եմ էնտեղ գիշերը, որ առավոտյան գործի գնամ... երկու տարի անցել ա, չեմ հիշում»:
Մեղադրողի մյուս հարցին` ցույցերին մասնակցելու հորդոր կամ կոչ ինչ-որ մեկն արել է իրեն, վկան բացասական պատասխան տվեց: Պետրոսյանի հարցին` ինչ են առգրավվել իրենցից, երբ քննչական բաժին էին բերման ենթարկել, վկան պատասխանեց. «Թղթեր, համակարգիչ, ձողեր... չեմ հիշում ուրիշ բան»:
Վկան հայտնեց նաեւ, որ տեղյակ չէ, թե ինչ գործունեություն են ծավալում ընդհանրապես այդ «գրասենյակում»: Սեֆիլյանի պաշտպան Մարինե Թովմասյանի հարցին` որտեղ է լսել Հիմնադիր խորհրդարանի մասին, Սերգեյ Գրիգորյանը պատասխանեց. «Հեռուստատեսությամբ եմ լսել, մնացածը չեմ հիշում»:
Նշենք, որ վկան գրեթե բոլոր հարցերի վերաբերյալ հայտարարում էր, թե չի հիշում: Պաշտպաններից Արայիկ Պապիկյանը հետաքրքրվեց, թե ովքեր են եկել գրասենյակ եւ ինչ են արել, վկան պատասխանեց, որ բոլորը քաղաքացիական հագուստով են եղել, ինչ-որ փաստաթուղթ են ցույց տվել եւ խուզարկել գրասենյակը:
Դատարանը հրապարակեց Սերգեյ Գրիգորյանի նախաքննական ցուցմունքը: Ըստ վկայի ցուցմունքի` ինքը գնացել է Հիմնադիր խորհրդարան, քանի որ իր համագյուղացի Հովհաննես Մինասյանը զանգել էր ոմն Երեմի ու գիշերելու տեղ խնդրել:
«Ես էնտեղ եմ գնացել, Երեմ անունով մի մարդ ինձ ընդունեց, ասաց, որ պետք է պայմանագիր կնքեմ Հիմնադիր խորհրդարանի հետ, բայց ես հրաժարվեցի: Ինձ նեկայացրին ապրիլի 24-ի միջոցառումների ցանկը: Ես հարցրի` որ խժդժություններ լինեն, սահմանում ծառայող տղաների համար վտանգավոր չի լինի, Երեմն ինձ պատասխանեց, որ չէ... քանի որ ժամը 18:00-ին մոտ էր, չէի կարող գյուղ հասնել, Երեմն առաջարկեց, որ մնամ, ես էլ համաձայնվեցի: Գիշերը տարբեր մարդիկ էին գալիս ու գնում, որոնց դեմքով չէի ճանաչում»,- նախաքննության ընթացքում վարույթն իրականացնող մարմնին պատմել է Սերգեյ Գրիգորյանը:
Դատարանում վկան նշեց, որ ինքը պնդում է նախաքննության ընթացքում տված ցուցմունքը: Արայիկ Պապիկյանը հետաքրքրվեց` ինչպես է ստացվում, որ հակասություններ կան նախաքննական եւ դատաքննության ընթացքում տված ցուցմունքներին, Սերգեյ Գրիգորյանը նշեց` չի հիշում: Արայիկ Պապիկյանի հարցին` ինչ է նշանակում խժդժություններ, ինչպես որ նշել էր նախաքննական ցուցմունքում, վկան պատասխանեց. «Բողոքի ակցիա են անում էլի որ մարդիկ»:
Թե ինչ է բացատրել Երեմը ծրագրերի մասին, Սերգեյ Գրիգորյանը հայտնեց, որ այդ մասին ցուցմունքում գրված է: Հատկանշական է, որ վկան չկարողացավ դատարանում կրկնել ցուցմունքի այդ հատվածը: Վկան կրկին պնդեց, որ ինքն ընդամենը գնացել էր այնտեղ գիշերելու համար:
