Հայ ուսանողները ծրագիր են պատրաստում սեւ-սպիտակ տեսանյութերը գունավոր դարձնելու համար:
Ուսանողներն իրենց նորույթը ներկայացրել են Երեւանում կազմակերպված DigiTec տեխնոլոգիական ցուցահանդեսում՝ «Երազողները» ֆիլմի հատվածների օրինակով: 1969 թվականին նկարահանված այս կարճամետրաժ վավերագրական ֆիլմը հայկական առաջին ռոք խմբերից մեկի մասին է: Ժապավենը հեռուստատեսությամբ ցուցադրել են, որից հետո այն կորել է արխիվներում, եւ այն գտել են բոլորովին վերջերս:
Իսկ 4-րդ կուրսեցի Գրիշա Թադեւոսյանը եւ կիրառական մաթեմատիկայի ֆակուլտետի նրա ընկերները որոշել են այս ֆիլմը երկրորդ անգամ կենդանացնել:
Լուսանկարների համար նման ծրագրեր արդեն կան: Գույները նրանք տարբերակում են հազարավոր եւ միլիոնավոր ծանոթ պատկերներում՝ դրանց գույները փոխադրելով անծանոթ պատկերներին: Այսպիսի ծրագրեր են մշակվում նաեւ տեսանյութերի համար, սակայն դրանք դեռեւս թանկ են ու բարդ:
Հիմա ուսանողներն արհեստական ինտելեկտին այնպիսի նրբություններ են սովորեցնում, ինչպիսին են կապույտի երանգները առավոտյան եւ երեկոյան երկնքում, գարնանային կամ աշնանային խոտի կանաչի երանգները, ֆիննի կամ հույնի մաշկի գույները: