Գյումրին երկու կարեւոր խնդիր ունի. տնակներից ձերբազատում եւ աշխատատեղերի ստեղծում: Այս մասին լրագրողների հետ զրույցում ասել է Գյումրիի քաղաքապետ Սամվել Բալասանյանը:
«Էս երկու կարեւոր խնդիրներն են, մնացածը մանր-մունր խնդիրներ են: Տարբեր տեսակի ծրագրերով, տարբեր բարերարների օգնությամբ, պետության աջակցությամբ նաեւ այդ խնդիրն ենք լուծել: «Գյումրին առանց տնակների» ծրագիրն իրականացվում է, հաշվառում անցկացվեց` հասկանալու, ինչքան տնակ կա Գյումրիում, հստակ չեմ հիշում թիվը, բայց 2000-ից ավելի հաստատ չեն: Կան մարդիկ, որոնց տնակները տվել ենք եւ իրենք շարունակում են ապրել տնակներում, տնակներ էլ կան, որ ուղղակի դրված են, բայց մարդ չի ապրում»,-ասաց նա:
Սամվել Բալասանյանի խոսքով, տնակներից ազատվելու հարցն ավելի հեշտ է, քան աշխատատեղեր ստեղծելը. «Անհրաժեշտ է ծրագրեր իրականացնել, որոնցով հնարավոր կլինի գործատեղեր ստեղծել: Շատ հայրենակիցներ եկել են, մանր ու միջին բիզնեսի հետ կապված մեծ ակտիվություն կա քաղաքում, բայց խոշոր բիզնեսի համար անհրաժեշտ է հարկային արտոնություն: Ես գտնում եմ, որ Շիրակի մարզի համար անհրժաշտ է հարկային արտոնություն, հատկապես Գյումրի քաղաքի համար, որպեսզի ներդրողների համար Գյումրին ավելի գրավիչ դառնա»:
