Արգենտինայի Հայկական Բարեգործական Ընդհանուր Միության Տիկնանց միության անդամները` գլխավորությամբ միության ատենապետուհի Մարթա Էմիրյանի, հոկտեմբերի 1-ին, այցելել են Մայր Աթոռ Սուրբ Էջմիածին:
Մայր Աթոռի տեղեկատվական համակարգից NEWS.am-ին հայտնում են, որ , միության անդամները հանդիպում են ունեցել Մայր Աթոռի Արտաքին հարաբերությունների եւ արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանի հետ:
Սրբազան Հայրը, հյուրերին փոխանցելով Գարեգին Բ Ամենայն Հայոց Կաթողիկոսի ողջույններն ու օրհնությունը, անդրադարձել են Տիկնանց միության կարեւոր դերակատարությանը Արգենտինայի համայնքային կյանքից ներս, մասնավորապես օգտաշատ գործունեությանը` ի նպաստ ապագա սերունդների հայեցի դաստիարակության, հայկական ինքնության եւ հայոց լեզվի պահպանման:
Այնուհետեւ Նաթան Սրբազանը խոսել է Սփյուռքի համայնքների առջեւ ծառացած խնդիրների, մարտահրավերների եւ դրանց հաղթահարման ուղիների մասին: Այս առնչությամբ մեծապես կարեւորվել է Հայոց Եկեղեցու առաքելությունը Սփյուռքում:
Վերջում Նաթան Սրբազանը, իր գնահատանքը հայտնելով Տիկնանց միության անդամներին, մաղթել է Ամենակալ Աստծո պահպանությունն ու առաջնորդությունը եւ արգասաբեր գործունեություն Արգենտինայի հայկական համայնքներում:
Ավարտին միության անդամները մասնակցել են Սուրբ Պատարագի արարողությանը, այցելել Մայր Աթոռի թանգարաններ:
Նույն օրը Գերաշնորհ Տ. Նաթան արքեպիսկոպոս Հովհաննիսյանն ընդունել է նաեւ Վիեննայի Պեռխդոսելդորֆի կաթոլիկ համայնքի ուխտավորներին՝ գլխավորությամբ համայնքի հոգեւոր հովիվ Հայր Յոզեֆ Գրյունվիդելի: