Ծերերին աշխատաշուկայում առավել երկար պահելու հարցը նախարարության ուշադրության կենտրոնում է: Այս մասին, այսօր՝ հոկտեմբերի 2-ին, լրագրողների հետ հանդիպման ժամանակ նշել է ՀՀ աշխատանքի եւ սոցիալական հարցերի նախարար Արտեմ Ասատրյանը՝ հավելելով, որ Հայաստանը զերծ չի մնացել ծերացման հիմնախնդիրներից. ՀՀ բնակչության շուրջ 11 տոկոսը տարեցներն են:
Արտեմ Ասատրյանի խոսքով, իրենք քայլեր են մշակում տարեցներին ավելի երկար ժամանահատվածում աշխատաշուկայում ներգրավված պահելու ուղղությամբ:
«Իհարկե, հաշվի առնելով երիտասարդների գործազրկության խնդիրը, առաջանում է որոշակի հարցադրում՝ ինչպես լուծել խնդիրը, որպեսզի աշխատաշուկայում տարեցներին հնարավորինս երկար պահենք, միաժամանակ ինչպես լուծենք երիտասարդության գործազրկության խնդիրը»,- ասաց նախարարը:
Նրա խոսքով՝ բազմաթիվ երկրներ առարկայական լուծումներ են տվել այս խնդիրներին, մասնավորապես, այն աշխատատեղերը, որոնք առավելապես կարող են զբաղեցնել տարեցները, եւ այդ աշխատատեղերում երիտասարդների ձգտումներն ավելի քիչ են, նպատակային ծրագրերի միջոցով խնդիրը կարգավորում են:
Նշենք, որ 2017 թվականի մայիսին ՀՀ Կառավարությունը հավանության է արժանացրել «Ծերացման հետեւանքների հաղթահարման եւ տարեցների սոցիալական պաշտպանության ռազմավարությունը եւ ռազմավարության իրականացման 2017-2021 թվականների միջոցառումների ծրագիրը», որի նպատակն է ստեղծել բարենպաստ եւ առողջ միջավայր տարեց մարդկանց համար՝ ապահովելով նրանց արժանապատիվ ծերացման գործընթացը:
Նշենք, որ արդեն 25 տարի է աշխարհում հոկտեմբերի 1-ը նշվում է որպես Տարեցների միջազգային օրը:
