Կողմնակի եկամուտի առկայության դեպքում քաղաքացիներին տրամադրվող անապահովության նպաստը կվերանայվի: Այս մասին, այսօր՝ հոկտեմբերի 2-ին, լրագրողների հետ հանդիպման ժամանակ նշել է ՀՀ աշխատանքի եւ սոցիալական հարցերի նախարար Արտեմ Ասատրյանը:
Նրա խոսքով, ներկայումս անպահովության գնահատման համակարգում տեղեկատվության ճշգրտման ուղղությամբ աշխատանքեր են տարվում, տեղեկատվական շտեմարաններում եղած տվյալները հստակեցվում են:
«Այն քաղաքացիները, որոնք ունեն ոչ ֆորմալ եկամուտ, պետք է տեղեկատվություն ներկայացնեն այդ մասին: Աստիճանական քայլերի միջոցով մենք ապահովելու ենք, որպեսզի տեղեկատվությունը ստացվի վարկային բյուրոներից: Դրանք բոլորը տվյալ քաղաքացու կամ ընտանիքի եկամուտները բնութագրող տվյալներ են», - նշեց նախարարը:
Արտեմ Ասատրյանը խոստովանեց, որ կողմնակի եկամուտ ստացող անձանց մասով իրենք տեղեկտվական բազա չունեն. «Այստեղից էլ գալիս է այն հիմնական խնդիրը, որ ոչ հասցեական նպաստ է նշանակվում: Որքան մենք մեծացնենք տեղեկատվության շրջանակը, այն լիարժեք դարձնենք ու կիրառենք անապահովության գնահատման ժամանակ, այնքան ավելի հասցեական կդարձնենք այդ վճարումները: Նպաստները կտրամադրվեն բացառապես այն ընտանիքներին, որոնք անապահով են»:
Նախարարը նշեց նաեւ, որ ոչ ֆորմալ դաշտում միջոցների հայտնաբերման նպատակով իրենք քաղաքացիներից եկամուտների վերաբերյալ հայտարարագիր կպահանջեն:
