Կատալոնիայում կիրակի անցկացված անկախության հանրաքվեն, որն ուղեկցվել է ոստիկանության հետ ընտրողների զանգվածային բախումներով, Եվրահանձնաժողովն ապօրինի է ճանաչել: Եվրահանձնաժողովը միաժամանակ Իսպանիայի իշխանություններին Կատալոնիայի անկախության կողմնակիցների հետ երկխոսելու կոչ է արել, փոխանցում է BBC-ի ռուսական ծառայությունը:
«Իսպանիայի Սահմանադրության համաձայն՝ երեկ Կատալոնիայում անցկացված քվեարկությունն ապօրինի էր»,- երկուշաբթի Բրյուսելում մամուլի ասուլիսի ժամանակ նշել է Եվրահանձնաժողովի ներկայացուցիչ Մարգարիտիս Սհինասը:
Եվրահանձնաժողովի կարծիքով՝ Կատալոնիայի անկախությունը Իսպանիայի ներքին գործն է, որը պետք է կարգավորվի Իսպանիայի Սահմանադրության համաձայն: Սակայն Եվրահանձնաժողովը միաժամանակ հիշեցրել է, որ «բռնությունը երբեք չի կարող քաղաքականության գործիք լինել»:
Նա կողմերին երկխոսելու կոչ է արել եւ հիշեցրել, որ երկուշաբթի Եվրահանձնաժողովի ղեկավար Ժան Կլոդ Յունկերը Կատալոնիայի իրավիճակը կքննարկի Իսպանիայի վարչապետ Մարիանո Ռախոյի հետ: