Սեպտեմբերի 30-ին եւ հոկտեմբերի 1-ին Եվրոպական ժառանգության օրերի շրջանակներում Արցախի մշակույթի, երիտասարդության հարցերի եւ զբոսաշրջության նախարարությունը նախաձեռնել է «Ժառանգությունը եւ բնությունը. հնարավորությունների բնատեսարան» խորագրով ավելի քան երեք տասնյակ ակցիաներ:
Արցախի էկոնոմիկայի նախարարությունից NEWS.am-ին հայտնում են, որ անցած երկու օրերի ընթացքում Արցախում կազմակերպվել են օրվա թեմային համահունչ դասընթացներ եւ ֆիլմերի ցուցադրություններ, բաց դռների օրեր, այցելություններ բնական եւ պատմամշակութային հուշարձանների տարածքներ, հանդիպում-քննարկումներ: Միջոցառումները հիմնականում կայացել են համայնքների բնական վայրերում, պետական արգելոցներում, բնական եւ պատմական հուշարձանների տարածքներում:
Տիգրանակերտի արգելոցում ֆիզիկական սահմանափակ հնարավորություն ունեցող անձանց համար կազմակերպված էքսկուրսիայի ընթացքում Արցախի մշակույթի, երիտասարդության հարցերի եւ զբոսաշրջության նախարար Սերգեյ Շահվերդյանը ընդգծել է մշակութային ժառանգության վայրերի հասանելիության կարեւորությունը եւ համոզմունք հայտնել այդ ուղղությամբ տարվող աշխատանքների շարունակականության վերաբերյալ:
Եվրոպական ժառանգության օրերը նշվում են 1985 թվականից, Եվրոպայի խորհրդի անդամ պետությունների ճարտարապետական ժառանգության համար պատասխանատու նախարարների համաժողովի որոշմամբ: Ակցիային միացել են ավելի քան 50 երկիր, այդ թվում՝ Հայաստանն ու Արցախը:
Նշենք, որ Արցախի Հանրապետությունը միացել է Եվրոպայի ճարտարապետական ժառանգության պաշտպանության մասին եւ հնագիտական ժառանգության պահպանության մասին կոնվենցիաներին 2015 թվականին: