Լաս Վեգասում հրաձգության հետեւանքով հայերի տուժելու մասին այս պահին հաստատված տեղեկություններ չկան։ Այդ մասին Twitter-ում գրել է ՀՀ ԱԳՆ մամուլի քարտուղար Տիգրան Բալայանը։ Նրա խոսքով, Լաս Վեգասում ՀՀ պատվավոր հյուպատոսը մշտական կապի մեջ է տեղի իշխանությունների եւ իրավապահ մարմինների հետ։
Հրաձգությունը տեղի է ունեցել երաժշտական փառատոնի ժամանակ՝ կիրակի երեկոյան, Լաս Վեգասի օդանավակայանի եւ Mandalay Bay հյուրանոց-խաղատան միջեւ հատվածում:
Զոհվել է ավելի քան 50 մարդ, եւ 400-ից ավել մարդ վիրավորվել է:
Հրաձգությունը կատարվել է հյուրանոցի 32-րդ հարկից: Համերգի ժամանակ ներկա են եղել տասնյակ հազարավոր մարդիկ: Ոստիկանության տվյալներով՝ հրաձգությունը կատարվել է 64-ամյա Սթիվեն Պեդոկի կողմից, ով ինքնասպան է եղել ոստիկանության աշխատակիցների ժամանելուց առաջ:
