ԱՄՆ Ինդիանայի նահանգում ապրող զույգը, որն Amazon օնլայն խանութին խաբել էր 1․2 մլն դոլարով, խոստովանել է իր մեղքը, հայտնում է The Star Press-ը։
Էրին եւ Լիա Ֆինանները հնարք էին գտել փչացած ապրանքը վերադարձնելու ժամանակ խարդախության համար։ Amazon-ի կանոնների համաձայն՝ խոտանով ապրանքը պարտադիր չէ վերադարձնել՝ մինչեւ փոխարինող ապրանքը ստանալը։ Զույգը կեղծ էլեկտրոնային հասցեներ էր գրանցել եւ դրանցով ապրանքներ պատվիրել, իսկ ստանալուց հետո անմիջապես պահանջել էր փոխել դրանք դեֆեկտի պատճառով։
Այդպիսով ստանալով, օրինակ, երկրորդ սմարթֆոնը կամ այլ տեխնիկա՝ զույգը չէր շտապում վերադարձնել իբր դեֆեկտավոր ապրանքը։ Ինտերնետ խանութի ներկայացուցիչները նույնպես նրանցից չէին պահանջել դա։
Ստացած տեխնիկան վաճառելով՝ զույգը 1,2 մլն դոլար էր վաստակել։
Էրին եւ Լիա Ֆինաններին մինչեւ 20 տարվա ազատազրկում է սպառնում։