Հայաստանի տնտեսական մրցակցության պետական հանձնաժողովը Երեւանի 8 խոշոր սուպերմարկետներում հետազոտություններ է կատարել, որոնց արդյունքում խախտումներ են հայտնաբերվել։ Այս մասին հոկտեմբերի 3-ին՝ լրագրողների հետ հանդիպման ժամանակ, ասաց Տնտեսական մրցակցության պետական հանձնաժողովի պետ Արտակ Շաբոյանը։
Խախտումների հիմնական մասը, ըստ նրա, այն է եղել, որ գրեթե բոլոր խանութներում խտացրած կաթի փոխարեն կաթ պարունակող մթերքներ են վաճառվել։ «Դրանք արտաքինով համով եւ գույնով նման մթերքներ են։ Սակայն իրականում տարբեր արտադրանքներ են»,- պարզաբանեց Շաբոյանը՝ հավելելով, որ ՀՀ օրենսդրության համաձայն՝ մթերքներից մեկը խտացրած կաթ է, մյուսը՝ կաթ պարունակող մթերք։
Շաբոյանը նշեց, որ գնի տարբերությունը դրանց միջեւ կարող է 40 տոկոս կազմել։ Ուսումնասիրությունների ընթացքում նման խախտումներ են հայտնաբերվել նաեւ հալած պանրի մեջ։ Հալած պանրի փոխարեն բուսական յուղ պարունակող մթերքներ են առաջարկվել գնորդներին։
Խախտումների համար սուպերմարկետներին խսիտ նկատողություն է արվել եւ վարչական գանձում իրականացվել։