Իրաքի Քուրդիստանը մտադիր է նոյեմբերի 1-ին նախագահական եւ խորհրդարանական ընտրություններ անցկացնել: Այս մասին հայտնում է Reuters-ը՝ վկայակոչելով Rudaw TV-ին:
Քուրդիստանի շրջանային կառավարությունը դեռեւս անկախության հռչակման մասին չի հայտարարել, եւ քվեարկության ընթացքում կընտրվի շրջանի նախագահ ու խորհրդարան, այլ ոչ թե անկախ պետության:
Իրաքի քրդերը սեպտեմբերի 25-ին քվեարկել են անկախ պետություն ստեղծելու օգտին: Կենտրոնական ընտրական հանձնաժողովի տվյալներով՝ հանրաքվեն կայացած է ճանաչվել, քվեարկությունն առանց խախտումների է ընթացել: Հանրաքվեին մասնակցած ընտրողների 92 տոկոսից ավելին կողմ է արտահայտվել անկախ պետության ստեղծմանը:
Իրաքի Քուրդիստանի անկախության հանրաքվեի անկացումը առաջացրել է Բաղդադի, ինչպես նաեւ հարեւան երկրների՝ Թուրքիայի եւ Իրանի բացասական արձագանքը: ԱՄՆ-ն հայտարարել է, որ «վիճելի տարածքներում հանրաքվեի անցկացումն առանձնապես սադրիչ է եւ ապակայունացնող»: Մոսկվան այս կապակցությամբ կոչ է արել Էրբիլի եւ Բաղդադի միջեւ բոլոր վիճելի հարցերը լուծել երկխոսության ճանապարհով:
