ԵՏՄ-ին Հայաստանի անդամակցությամբ երկրում զբաղվածությունը 13 տոկոսով կրճատվել է: Հոկտեմբերի 3-ին ԱԺ-ում այս մասին ասաց «Ելք» դաշինքի խմբակցության ղեկավար Նիկոլ Փաշինյանը՝ ներկայացնելով Եվրասիական միությունից Հայաստանի դուրս գալու հայտարարության նախագիծը: «Ելքն» առաջարկում է այս նպատակով խորհրդարանական ժամանակավոր հանձնաժողով ստեղծել եւ քննարկել ԵՏՄ-ին Հայաստանի անդամակցության դրական եւ բացասական կողմերը:
Ընդդիմադրի խոսքով՝ Միությանը Հայաստանի անդամակցելուց հետո միջազգային պահուստները կրճատվել են 40 տոկոսով, իսկ պետական պարտքը 10 տոկոսով աճել է: 2018 թվականի հունվարից էլ կփոխվի ապրանքների մոտ 900 տեսակի մաքսատուրքը: «Այս ամենը Հայաստանի մանրամասն ախտորոշում է պահանջում՝ մագնիսառեզոնանսային տոմոգրաֆիայով: Իսկ իշխանություններն ասում են՝ ինչ տոմոգրաֆիա, մորիով թեյ կխմենք, կքրտնենք եւ կառողջանանք»,- հավելեց Փաշինյանը:
Նշենք, որ Հայաստանի արտաքին պահուստները սկսել են նվազել դեռեւս մինչ Եվրասիական միությանն անդամակցելը: 2014 թվականին դրանք կրճատվել են 33 տոկոսով, մինչեւ 1 489 մլն դոլար, իսկ 2015 թվականին՝ Եվրասիական միություն մտնելու պահից, սկսել են աճել մինչեւ 1 775 մլն (2015) եւ 2 200 մլն դոլար (2016):