Մուհամմեդ Թոֆիկ Ռահիմը Իրաքի Քուրդիստանի նախագահի միակ թեկնածուն է։ Նախագահական ընտրությունները կկայանան նոյեմբերի 1-ին, փոխանցում է AFP-ն՝ վկայակոչելով ինքնավար շրջանի ընտրական հանձնաժողովի նախագահ Հաջի Օմարին։
«Երեքշաբթի լրացել է թեկնածության առաջադրման ժամկետը։ Մենք ստացել ենք բոլոր անհրաժեշտ փաստաթղթերը, որոնք թույլ են տալիս Մուհամմեդ Թոֆիկ Ռահիմին դառնալ Քուրդիստանի նախագահի թեկնածու։ Նա միակն է, ով առաջադրել է իր թեկնածությունը»,- ասել է հանձնաժողովի նախագահը գործակալությանը, որը թեկնածուին գործող նախագահ Մասուդ Բարզանիի մրցակից է անվանում։
Այս շրջանում նախագահական ընտրություններ վերջին անգամ ընթացել էին 2009-ին։ Բարզանիի լիազորությունների ժամկետը լրացել էր 2013 թվականին եւ 2 անգամ երկարաձգվել։
