Եվրասիական միության կազմում լինելով՝ հնարավոր է բարձրացնել նաեւ Ադրբեջանին ռուսական զենք վաճառելու հարցը: Հոկտեմբերի 3-ին ԱԺ-ում այս մասին նշեց ԱԺ փոխխոսնակ Միքայել Մելքումյանը՝ ներկայացնելով Եվրասիական միությունից Հայաստանի դուրս գալու մասին հայտարարության նախագծի վերաբերյալ իր խմբակցության տեսակետը:
Նրա խոսքով՝ 2015 թվականին Ռուսաստանն Ադրբեջանին 25 մլրդ դոլարի զենք է վաճառել, 2016-ին՝ 10 մլրդ դոլարի: Այս տարի՝ շատ ավելի քիչ, բայց այս դեպքում էլ պետք է հրապարակայնորեն հարցնել, թե որքանով է սա համապատասխանում հայ-ռուսական դաշնակցային հարաբերություններին:
Մելքումյանը նշեց, որ մեկ այլ հարց է Հայաստանում ռուսական գազի բարձր հավելագինը: Համեմատության համար՝ Վրաստանն Ադրբեջանից գազը գնում է 200 դոլարով, իսկ բնակչությանն է վաճառում 240-245 դոլարով: Մինչդեռ Հայաստանը ստանում է 150 դոլարով, իսկ բնակչությանն է վաճառում 2 անգամ ավելի թանկ: Այսպիսով, տնտեսական հարցեր կան, սակայն չպետք է համարել, որ սրա մեղավորը ԵՏՄ-ն է, եւ որ անհնար է խնդիրները լուծել միության կազմում մնալով: «Մյուս կողմից՝ հարցեր կան նաեւ Եվրամիության հետ: մենք կարող ենք առանց մաքսատուրքի արտահանել 6400 տեսակի ապրանք, իսկ փաստացի արտահանում ենք ընդամենը 800-900: Ի՞նչն է մեզ խանգարում օգտվել GSP+ մաքսային ռեժիմի բոլոր օգուտներից: Նշանակում է՝ խնդիրներ կան, որոնք մենք չենք կարողանում հաղթահարել: Խոսքն առաջին հերթին բիզնեսի համար ֆինանսական միջոցների հասանելիության մասին է»,- նշեց Միքայել Մելքումյանը:
