Ֆրանսիայի Ազգային ժողովի պատգամավորների մեծամասնությամբ ընդունվել է «ներքին անվտանգության եւ ահաբեկչության դեմ պայքարի ուժեղացման մասին» նոր օրենքը, հաղորդում է RFI-ն:
Օրենքն ընդունվել է Ազգային ժողովի պատգամավորների կողմից առաջին ընթերցմամբ: Օրենքի ընդունմանը կողմ է քվեարկել 415 պատգամավոր, դեմ՝ 127, 19-ը` ձեռնպահ: Այժմ խորհրդարանի ստորին պալատը պետք է փոխզիջման գնա վերին պալատի հետ, քանի որ սենատորները օրենքում նախատեսված որոշակի սահմանափակումների կողմնակից են:
Ահաբեկչության դեմ պայքարի մասին օրենքը թույլ կտա Ֆրանսիայի իշխանություններին վերացնել 2015-ին ընդունած արտակարգ դրությունը, սակայն ընդհանուր առմամբ նոր օրենքը կրկնում եւ նույնիսկ ուժեղացնում է նախորդի դրույթները:
Ահաբեկչության դեմ պայքարի մասին օրենքը վերջնականապես պետք է ընդունվի հոկտեմբերի կեսերին: Le Figaro թերթի հրապարակած հարցման համաձայն՝ ֆրանսիացիների 57 տոկոսը կողմնակից է ահաբեկչության դեմ պայքարի նոր միջոցներին: