Հանրության մեջ դատախազությունն ընկալվում է որպես ոչ թե հանցագործությունների բացահայտմանը նպաստող եւ ղեկավարող մարմին է, այլ հանցագործություն կոծկող մարմին: Այս մասին այսօր՝ հոկտեմբերի 4-ին, ԱԺ-ում «Դատախազության մասին» օրենքի փոփոխությունների քննարկման ժամանակ իր ելույթում նշել է «Ելք» խմբակցության ղեկավար Նիկոլ Փաշինյանը:
«Ես ուզում եմ զեկուցողներից խորհուրդ հարցնել, թե ինչպիսի փոփոխություն պետք է կատարել այս օրենքում, որ ի վերջո, դատախազությունն այս երկրում դադարի հանցագործություն կոծկել: Դուք բոլորդ հիշում եք «Զիբիլիկսի» հայտնի գործը, երբ «Ելք» դաշինքի ներկայացուցիչները ՀՀԿ նախընտրական շտաբից դուրս բերված պարկի միջից հայտնաբերել էին փաստաթղթերի փաթեթ, 30 անուն փաստաթուղթ, որոնք վկայում էին ՀՀԿ-ի կողմից ընտրակաշառի համակարգված մեխանիզմ ստեղծելու մասին: Ես հրապարակել էի այդ գլուխգործոց փաստաթուղթը, ըստ որի ոստիկանության Արաբկիրի բաժնից ցուցակ են ուղարկել այն մասին, թե ՊՊԾ գնդից յուրաքանչյուր ծառայող որքան ձայն պետք է ապահովի ՀՀԿ-ի համար: Ոստիկանության բաժնից ֆաքսը դուրս է եկել եւ գնացել Տարոն Մարգարյանի կամ ՀՀԿ-ի շտաբ»,-հայտարարեց Նիկոլ Փաշինյանը:
Նա տեղեկացրեց, որ քրեական գործ էր հարուցվել ՀՔԾ-ում, որը կարճվել էր՝ հիմնավորելով, որ խոսքը հավաք-միջոցառման մասին է, թե ՊՊԾ գնդի ծառայողը տագնապի դեպքում քանի մարդու պետք է տեղյակ պահի:
«Մենք բողոքարկել ենք այդ որոշումը դատախազություն եւ պահանջում ենք հայտնել, թե այդ ֆաքսը, որ դուրս եկել ՊՊԾ գնդից, որ հեռախոսահամարին է գնացել, որ հասկանանք, թե ինչ է եղել: Քննիչը չի պարզել դա: Դատախազությունը մերժել է մեր բողոքը՝ ասելով, դե հավաք-միջոցառման ցուցակն է, ի՞նչ կարիք կա պարզելու: Մենք ուզում էինք հասկանալ` դա ընտրակաշառքների ցուցա՞կ է, զորահավա՞ք է, դրամահավա՞ք է։ Մենք ասում ենք` այս ցուցակը դուրս է եկել ՀՀԿ նախընտրական շտաբից, սա հանցագործություն է»,-ընդգծեց Փաշինյանն ու հավելեց. «Մենք ասում ենք, որ ցուցակը գնացել է ՀՀԿ շտաբ եւ դա մեր պետության խայտառակությունն է, որ ոստիկանության պաշտոնյան ցուցակ է պատրաստում իր ծառայողների անհատական տվյալներով եւ ֆաքսով ուղարկում ՍԱՍ սուպերմարկետի ախռանայի պետին: Ու դատախազությունը փակում է ականջներն ու աչքերը: Դե ասեք, ի՞նչ փոխենք օրենքի մեջ, որ այսպես չլինի հետագայում»:
