2017 թվականի սկզբից երկարատեւ օգտագործման ապրանքների ներկրման աճ է արձանագրվել, ինչը վկայում է տնտեսության դրական միտումների մասին՝ բնակչության գնողականության աճից մինչեւ մաքսային վարչարարության բարելավում։
Այս մասին այսօր՝ հոկտեմբերի 4-ին, լրագրողների հետ հանդիպման ժամանակ նշել է ՊԵԿ նախագահ Վարդան Հարությունյանը:
Անդրադառնալով ստվերային տնտեսությանը, Վարդան Հարությունյանը նշեց, որ 2017-ի հունվարից ստվեր է գնահատվել 100 մլն դրամ եւ ավելի իրացման շրջանառություն հայտարարագրած 4537 առեւտրային հարկ վճարողների մոտ:
«Վերլուծությունների արդյունքում նրանցից 2085-ի մոտ վերհանվել են ռիսկեր, եւ գնահատված ստվերի հիման վրա հաշվարկված պետական եկամուտների միջին ամսական ռիսկը սեպտեմբերի 1-ի դրությամբ կազմել է շուրջ 2.8 մլրդ դրամ»,-ասաց ՊԵԿ նախագահը:
Նրա խոսքով, ՊԵԿ-ի կողմից իրականացվել է 2 հազար օպերատիվ ստուգում, որի արդյունքում արձանագրվել է 2.2 մլրդ դրամի լրացուցիչ հավաքագրում բյուջե:
Հարցին, թե արդյոք այդ 2.2 մլրդ դրամի ցուցանիշը բավարար է, թե ստվերն ավելի մեծ է, Վարդան Հարությունյանը պատասխանեց, որ միայն դա չի ստվերից բերած գումարը. «Ստվերի գնահատականը 2,8 մլրդ է։ Ստվերի այդ թվերը նախկինում ավելի մեծ էին ու դեռ նվազելու են»:
