ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը հոկտեմբերի 4-ին ընդունեց Հայաստանում Իտալիայի արտակարգ եւ լիազոր դեսպան Ջովաննի Ռիչուլլիին։
Նախարարությունից NEWS.am-ին հայտնում են, որ ողջունելով դեսպանին՝ նախարարը կարեւորեց տրանսպորտի եւ ճանապարհաշինության ոլորտներում հայ-իտալական համագործակցության ամուր հիմքերը:
Վահան Մարտիրոսյանն անդրադարձավ իտալական կազմակերպությունների ու իտալացի մասնագետների ներգրավմամբ իրականացվող ճանապարհաշինական ծրագրերին՝ կարեւորելով նրանց առավել ակտիվ մասնակցությունը։
Խոսելով «Հյուսիս-հարավ ճանապարհային միջանցք» ներդումային ծրագրի ներկա եւ հետագա ընթացքի մասին՝ նախարարը ներկայացրեց ծրագրում ներգրավված իտալական ընկերությունների աշխատանքի դրական ու բացասական արդյունքները: Նա ընդգծեց, որ նախարարության ներկայացուցիչներն ամենօրյա հսկողություն են իրականացնում առկա թերացումները շտկելու ուղղությամբ, նաեւ խնդրեց դեսպանին իր կողմից եւս ուշադրության կենտրոնում պահել խնդիրը։
Հանդիպման ընթացքում քննարկվեցին «Հայաստանի եւ Իտալիայի կառավարությունների միջեւ ուղեւորների եւ բեռների միջազգային ավտոտրանսպորտային փոխադրումների մասին» համաձայնագրում առաջիկայում լրացում կատարելու մասին արձանագրության նախագծին առնչվող մի շարք հարցեր։
Նախարարը դեսպանին ներկայացրեց նաեւ վերջին օրերին Երեւանում անցկացված ՏՏ ոլորտի մի շարք միջազգային համաժողովների արդյունքները եւ հույս հայտնեց, որ առաջիկայում իտալական ընկերությունների հետ եւս այս ոլորտում համագործակցության հիմքեր կստեղծվեն, կբարձրանա հայկական ՏՏ ոլորտի ընկերությունների ներգրավվածությունը եւ ներկայացվածությունը Իտալիայում։
