Ժիրայր Սեֆիլյանի եւ մյուսների գործով արդեն մեկ տարուց ավելի կալանքի տակ գտնվող Ներսես Պողոսյանը, որն արդեն մեկ շաբաթ հացադուլի մեջ է, հյուծված վիճակում է: Այս մասին NEWS.am-ի հետ զրույցում ասաց նրա քույրը՝ Վարսիկը: Նա նշեց, որ եղբայրը հոկտեմբերի 3-ին տեսակցել է Ներսեսին, փորձել համոզել, որպեսզի դադարեցնի հացադուլը, սակայն, ապարդյուն:
«Պայքարի միակ ձեւը դա է տեսնում, ասում է՝ ինչքան կարող է ճաղերի հետեւում սպասել, առանց հանցագործություն գործելու նստել ուրիշի փոխարեն: Անգամ հիվանդ մայրս է զանգել, խնդրել, որ դադարեցնի, բայց չի լսում»,-ասաց նա:
Վարսիկը նշեց, որ իր եղբայրը երիկամների եւ տեսողության հետ կապված առողջական խնդիրներ ունի եւ նրան հացադուլ անելը հակացուցված է:
Ներսեսն հացադուլը սկսել էր սեպտեմբերի 29-ին Երեւանի Շենգավիթ վարչական շրջանի դատարանում տեղի ունեցած նիստից անմիջապես հետո: Նա հացադուլ սկսելու մասին հայտարարել է այն բանից հետո, երբ դատարաը մերժել է նրա խափանման միջոց կալանքը փոխելու վերաբերյալ իր պաշտպանի միջնորդությունը:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան: