Փարիզում ՅՈՒՆԵՍԿՕ Գործադիր խորհրդի 202-րդ նստաշրջանն է բացվել: Օրակարգում ներառված է գլխավոր տնօրենի պաշտոնի թեկնածուների քննարկման հարցը, հաղորդում է ՄԱԿ ռադիոն:
Ներկայումս ՅՈՒՆԵՍԿՕ գլխավոր տնօրենի պաշտոնի համար 8 թեկնածու է առաջադրվել: Նրանց թվում է Ադրբեջանից Պոլադ Բյուլբուլօղլուն: Այլ թեկնածուները Վիետնամից, Եգիպտոսից, Կատարից, Չինաստանից, Իրաքից, Լիբանանից եւ Ֆրանսիայից են:
ՅՈՒՆԵՍԿՕ նոր ղեկավարի մասին որոշումը կկայացվի հոկտեմբերի 9-ի գաղտնի քվեարկության արդյունքներից հետո: Կանցնի այն թեկնածուն, որը կկարողանա ստանալ ձայների բացարձակ մեծամասնությունը:
ՅՈՒՆԵՍԿՕ-ն չի բացառում, որ ձայների անհրաժեշտ մեծամասնությունը ստանալու համար քվեարկության մի քանի փուլ կպահանջվի:
Ակնկալվում է, որ հաղթողի անունը կհայտարարվի հոկտեմբերի 13-ից ոչ ուշ:
Նոր գլխավոր տնօրենը, ով լիազորությունները կստանձնի նոյեմբերի 15-ին, կփոխարինի Իրինա Բոկովային: