Շենավան համայնքի ղեկավար 37-ամյա Արթուր Մկրտչյանը պնդում է, որ Կարմիր գրքում գրանցված սպիտակագլուխ անգղեր չի որսացել: NEWS.am-ի հետ զրույցում այսօր՝ հոկտեմբերի 5-ին, Արթուր Մկրտչյանը նշեց, որ ընկերոջ հետ ընդամենը լուսանկարվել է ուրիշի կողմից որսած անգղերի հետ:
«Համացանցում հայտնված այդ լուսանկարը շատ հին է՝ 2007թ., ընկերոջս հետ ենք, անցնում էինք ճանապարհին տենց քցած էին, մենք էլ հետը լուսանկարվեցինք, բոլորն էլ լուսանկարվում էին, ոչ մեկ անտարբեր չէր անցնում: Հետաքրքրության համար նկարվել ենք: Համացանցում 6 տարի գցած է ու չեմ հասկանում՝ ինչ է կատարվում»,-ասաց նա:
Նշենք, որ սպիտակագլուխ անգղը վտանգված տեսակ է: Գրանցված է նախկին ԽՍՀՄ և Ռուսաստանի Կարմիր գրքերում: Տեսակն ընդգրկված է ԲՊՄՄ Կարմիր ցուցակում (ver. 3.1) «Least Concern» կարգավիճակով: Ընդգրկված է նաև Հայաստանի Կարմիր գրքում:
Արթուր Մկրտչյանը համայնքի ղեկավար է 2005թ.-ից, իսկ մինչ համայնքի ղեկավար ընտրվելն աշխատաքային այլ գործունեություն չի ունեցել: Վերջինս նաև կուսակցական պատկանելություն ունի՝ ՀՀԿ-ական է: Արմավիրի մարզի Շենավան համայնքը ունի մոտ 1600 բնակիչ:
