Հաճախ լսում ենք, երբ ասում են՝ պետական գույքը վաճառվել է, քանի որ պետությունը վատ կառավարիչ է, սակայն մենք տեսնում ենք նաեւ սնանկացած կառույցներ: Այս մասին, այսօր՝ հոկտեմբերի 5-ին, ԱԺ-ում Պետական գույքի մասնավորեցման 2006-2007թթ. ծրագրի կատարման 2016թ. տարեկան հաշվետվության քննարկման ժամանակ նշել է «Ելք» խմբակցության պատգամավոր Գեւորգ Գորգիսյանը:
Նա հարց ուղղեց ԿԱ առընթեր պետական գույքի կառավարման վարչության պետ Արման Սահակյանին, թե եթե սեփականաշնորհումից հետո լինում են սնանկացումներ, չե՞ք կարծում, որ ճիշտ չեն ընտրվել շահագործողները, եւ չպե՞տք է պատժվեն որոշում կայացնողները, քանի որ «այդ մարդիկ փաստացի գույքը վերցրել են, ունեցվածքը կոռուպցիոն ձեւով վաճառել են ու արդյունքում այդ օբյեկտները վերացել են»:
Ի պատասխան Արման Սահակյանը նշեց, որ խոսքն ընդամենը 3 ընկերության մասին է, եւ նրանց սնանկացման գործընթացը չի սկսվել մասնավորեցումից հետո:
«Այն ընկերությունները որոնք ֆինանսապես «վատառողջ» են եղել, սնանկացման են գնացել: Օրենքը չի արգելում մասնավորեցման գործընթացը: Մասնավորեցման ծրագիր ունենք 2001, 2003 թթ, սնանկացման գործընթացները չեն սկսվել մասնավորեցումից հետո»,-ասաց նա:
Իր հերթին «Ծառուկյան» խմբակցության պատգամավոր Վարդան Բոստանջյանը նշեց. «Նաեւ ուզում եմ անդրադառնալ այն խնդրին, երբ պետական գույքը սիմվոլիկ գներով է օտարվում: Մեկ էլ տեսնում ենք, որ հաջորդ օրը այն անմիջապես վարձակալվում է, իսկ մեկ տարվա վարձակալությունն էլ ավելի թանկ է, քան իր վճարած գինը: Այս պրակտիկան վերանալո՞ւ է, թե ոչ»:
Արման Սահակյանը հայտարարեց, որ 2011 թվականից ի վեր նման դեպք չունեն, բոլոր օտարումները ներկայացնում են շուկայական արժեքով, որից հետո լինում են ներդրումներ:
Նշենք, որ Ազգային ժողովում քննարկվում է Կառավարության կողմից ներկայացված պետական գույքի մասնավորեցման 2006-2007թթ. ծրագրի կատարման 2016թ. տարեկան հաշվետվությունը հաստատելու մասին նախագիծը ընդունելու մասին հարցը:
