Մարդիկ պետք է հասկանան, որ պետք է զբաղվեն բնության պահպանմամբ, ոչ թե ոչնչացմամբ: Կարմիր գրքում գրանցված սպիտակագլուխ անգղերի որսի վերաբերյալ հրապարակման մասին NEWS.am-ի հետ զրույցում նման կարծիք հայտնեց բնապահպան Կարինե Դանիելյանը:
«Մարդկության գաղափարները, մտածելակերպը պետք է փոխվի: Մարդկանց միջից պետք է դուրս գա այն գաղափարը, թե ուժեղ տղամարդ եմ ու կարող եմ կենդանի սպանել: Մինչդեռ դու ուժեղ տղամարդ ես, եթե պահպանում ես բնությունը»,- ասաց Կարինե Դանիելյանը:
Հիշեցնենք, որ օրերս համացանցում հայտնվել էին լուսանկարներ, որտեղ Շենավանի գյուղապետն ու երկու այլ անձ լուսանկարվել էին «Կարմիր գրքում» գրանցված սպիտակագլուխ անգղերի հետ: Չնայած Շենավանի գյուղապետը լրատվամիջոցներին տված հարցազրույցներում պնդել էր, թե իրենք որս չեն կատարել, ընդամենը լուսանկարվել են գետնին ընկած անգղների հետ, ոստիկանությունը հայտարարել է, որ հիշյալ ապօրինի որսը 2007թ. Արմավիրի մարզում կատարել է 45-ամյա Յ. Պողոսյանը: Ի դեպ, Պողոսյանը գյուղապետի հետ լուսանկարված անձանցից մեկն է:
Նշենք, որ սպիտակագլուխ անգղը վտանգված տեսակ է: Գրանցված է նախկին ԽՍՀՄ և Ռուսաստանի Կարմիր գրքերում: Տեսակն ընդգրկված է ԲՊՄՄ Կարմիր ցուցակում (ver. 3.1) «Least Concern» կարգավիճակով: Ընդգրկված է նաև Հայաստանի Կարմիր գրքում: