Սամվել Բաբայանի եւ մյուսների գործով ամբաստանյալ Անդրանիկ Քոչարյանը, որը մեղադրվում է փողերի լվացման մեջ, այսօր՝ հոկտեմբերի 9-ին, դատարանում հրաժարվեց ցուցմունք տալուց:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում հրապարակվեց Անդրանիկ Քոչարյանի նախաքննական ցուցմունքը:
«Մեր տուն եկավ եղբայրս՝ Կարենը, որն ինձ տվեց 20 եվրոյանոց թղթադրամ կարմիր բծերը մաքրելու համար, ես դա փոխանցեցի Ժորա Զաքարյանին, դրանից հետո եղբայրս ինձ տվեց 2 հատ 20 եվրոյանոց եւ 1 հատ 50 եվրոյանոց, որ ներկը կրկին մաքրենք, ես դրանք կրկին փոխանցեցի Ժորային: Ես Ժորային չեմ հասցրել, թե ինչով է դրանք մաքրում»,- որպես վկա նախաքննական մարմնին պատմել է Անդրանիկ Քոչարյանը:
Որպես վկա՝ Անդրանիկ Քոչարյանը պատմել է, որ նոր խմբաքանակ թղթադրամների մասին իրեն եղբայրն է հայտնել: Արդեն մեղադրյալի կարգավիճակում Անդրանիկ Քոչարյանը հայտնել է, որ իրեն առաջադրված մեղադրանքը մասնակի է ընդունում:
Դատարանում Անդրանիկ Քոչարյանը հրաժարվեց նաեւ հարցերին պատասխանել: Ցուցմունք տալուց հրաժարվեց նաեւ ամբաստանյալներից Կարեն Քոչարյանը, որն Անդրանիկ Քոչարյանի եղբայրն է:
«Պնդում եմ իմ նախաքննական ցուցմունքը եւ հարցերին պատասխանելուց հրաժարվում եմ»,- ասաց Կարեն Քոչարյանը:
Դատավոր Արշակ Վարդանյանը հրապարակեց ամբաստանյալի նախաքննական ցուցմունքները: Որպես կասկածյալ՝ Քոչարյանը պատմել է, որ Սամվել Բաբայանն իրեն տվել է 20 եվրոյանոց թղթադրամ եւ խնդրել ճշտել՝ իրական է, թե կեղծ:
«Գնացի փոխանակման կետ, որի աշխատակիցն ինձ ասաց, որ թղթադրամը կեղծ չէ, բայց չի կարող այն փոխանակել, որովհետեւ ներկոտված է եւ մաշված: Այդ մասին տեղեկացրի Սամվել Բաբայանին, որն էլ ինձ հարցրեց՝ ոնց կարող ենք այդ հարցը լուծել: Ես հիշեցի, որ իմ համագյուղացի Ժորան քիմիկոս է եւ կարող է ներկն անցկացնել: Ես եղբորս միջոցով թղթադրամը փոխանցեցի Ժորային, որն էլ մի քանի օրից ինձ այն վերադարձրեց եւ ես տվեցի Սամվել Բաբայանին: Մի քանի օրից ինձ զանգահարեց Սամվել Բաբայանն ու ինձ ասաց, որ Մոսկվայում իրեն 5 հազար եվրո է պարտք, անհրաժեշտ է այն հասցնել Երեւան: Ես էլ դիմեցի Դավիթ Հարությունյանին, որն էլ իր ծանոթի միջոցով Մոսկվայից ավտոբուսով պետք է բերվեր Երեւան: Ես տեղյակ եմ եղել, որ թղթադրամները ներկոտված են եւ մաշված, ես այդ մասին նաեւ Դավիթին եմ տեղեկացրել, որ այդ թղթադրամները կեղծ չեն»,- պատմել է Կարեն Քոչարյանը:
Նա հայտնել է, թե տեղյակ չի եղել՝ ինչպես էր տնօրինվելու Երեւան բերված 5 հազար եվրոն: Մեղադրյալի կարգավիճակում Կարեն Քոչարյանը նշել է, որ իրեն առաջադրված մեղադրանքը մասնակի է ընդունում:
Հիշեցնենք, որ ըստ մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք:
Գործով որպես ամբաստանյալ անցնում են նաեւ Սանասար Գաբրիելյանը, Արմեն Պողոսյանը, Կարեն եւ Անդրանիկ Քոչարյանները, Ժորա Զաքարյանն ու Դավիթ Հարությունյանը:
Սամվել Բաբայանը, Սանասար Գաբրիելյանը և Արմեն Պողոսյանը կալանավորված են, իսկ մնացածը ստորագրությամբ ազատ են արձակվել: