Իրաքի Քուրդիստանի ղեկավար  Մասուդ Բարազանին պատրաստ է սառեցնել քրդական ինքնավարության անկախության հանրաքվեի արդյունքները պայմանով, եթե Բաղդադը հանի տարածաշրջանի նկատմամբ իր պատժամիջոցները։ Այս մասին հայտնել է Իրաքի փոխնախագահ Ուսամա ան Նուջեյֆին քուրդ առաջնորդների հետ բանակցություններից հետո, հայտնում է AlArabiya հեռուստաընկերությունը։

Նուջեյֆիի խոսքով, Բարզանին պատրաստ է Իրաքի իշխանությունների հետ երկխոսության։

Հոկտեմբերի 8-ին Իրաքի Քուրդիստանի առաջնորդը բանակցություններ է վարել Իրաքի փոխնախագահներ Ուսամա ան Նուջեյֆիի եւ Այադ Ալավիի հետ։ Նրանք քննարկել են ճգնաժամային իրավիճակից դուրս գալու հնարավոր ուղիները, մասնավորապես, առաջարկել են Էրբիլի եւ Բաղդադի միջեւ հակամարտության լուծման աստիճանական ծրագիր։

 Ընդ որում, Իրաքի վարչապետի գրասենյակի պաշտոնական ներկայացուցիչը նշել է, որ փոխնախարարների նախաձեռնությունը չի արտացոլում Բաղդադի պաշտոնական քաղաքականությունը։