Սերժ Սարգսյանը կնախագահի մինչեւ 2018–ի ապրիլը, իսկ թե ինչ կլինի այդ ժամկետից հետո, այդ հարցի շուրջ որեւէ քննարկում տեղի չի ունեցել։ Այս մասին հոկտեմբերի 9-ին՝ ԱԺ ավանդական ճեպազրույցների ժամանակ, ասել է ՀՀԿ խմբակցության ղեկավար Վահրամ Բաղդասարյանը՝ պատասխանելով հարցին, թե հնարավոր է արդյոք գործող նախագահն առաջադրվի վարչապետի պաշտոնում։
Նրա խոսքով՝ երբ ժամանակը գա, այդ հարցը կքննարկվի։ «Զինվեք համբերությամբ։ Մենք դեռ շատ խնդիրներ ունենք, եւ մենք դեռեւս դրանք լուծելով ենք զբաղված։ Քննարկումները կլինեն բաց, եւ բոլորին տեղյակ կպահենք»,– նշել է Բաղդասարյանը։