Անցած տարվա սեպտեմբերին կնոջը խեղդելով սպանելու մեջ մեղադրվող Արթուր Մելիքսեթյանն իրեն առաջադրված մեղադրանքը մասնակի է ընդունում:
NEWS.am-ի հետ զրույցում Մելիքսեթյանի պաշտպան Համլետ Ստեփանյանը նշեց, որ իր պաշտպանյալը վստահեցնում է, որ դիտավորյալ չի կատարել արարքը:
«Արթուրը պատմում է, որ կնոջ հետ վիճել է, այդ ընթացքում քաշքշոց է սկսվել, ինչի հետեւանքով կինն ընկել է ջրի մեջ եւ խեղդվել»,- ասաց պաշտպանը:
Նշենք, որ ըստ մեղադրանքի՝ Արթուր Մելիքսեթյանը 2016թ. սեպտեմբերի 19-ին ժամը 22:00-ի սահմաններում կնոջը, կասկածելով ամուսնական անհավատարմության մեջ, վիճել է նրա հետ: Վիճաբանության ընթացքում նախ մեքենայի մեջ, ապա հարակից դաշտամիջյան հատվածում ծեծել է կնոջն ու պարանոցը սեղմելով շնչահեղձ անելու եղանակով դիտավորությամբ կյանքից զրկել նրան:
Համլետ Ստեփանյանը հայտնեց նաեւ, որ այս գործով դատաքննությունն ավարտվել է, ներկայումս վիճաբանությունների փուլն է: