Բյուրեղավանի գիշերօթիկ դպրոցի նախկին տնօրեն, շուրջ 36 մլն դրամ յուրացնելու մեջ մեղադրվող Գայանե Մարգարյանը դատապարտվեց 6,5 տարվա ազատազրկման: Օրերս նման դատավճիռ է կայացրել Կոտայքի մարզի ընդհանուր իրավասության դատարանը:
Գործով ամբաստանյալ Փառանձեմ Մարտիրոսյանը դատապարտվել է 5,5 տարվա ազատազրկման, իսկ Արաքս Հովսեփյանը՝ 5,5 տարվա պայմանական ազատազրկման: Նշենք, որ ամբաստանյալներից կալանքի տակ էր միայն Գայանե Մարգարյանը:
NEWS.am-ի հետ զրույցում Գայանե Մարգարյանի պաշտպան Գագիկ Խաչիկյանը հայտնեց, որ համաձայն չեն դատավճռի հետ եւ բողոքարկելու են այն:
Դեռեւս հայտնի չէ, թե յուրացված 36 մլն դրամը ինչպես է փոխհատուցվելու: Գագիկ Խաչիկյանը նշեց, որ իրենք նախկինում 6 մլն դրամ փոխհատուցել էին:
Հիշեցնենք, որ ըստ մեղադրական եզրակացության՝ դպրոցի արդեն նախկին տնօրեն Գայանե Մարգարյանը ուղիղ 10 տարի պարբերաբար, առանց աշխատանքի ընդունելու մտադրության` շահադիտական նպատակով, կազմել է հաստատությունում փաստացի աշխատանքի չհաճախող, իսկ 2007 թվականի սեպտեմբերից կազմակերպության կադրերի գծով տեսուչ Արաքս Հովսեփյանին է հանձնարարել կազմել հաստատությունում փաստացի աշխատանքի չհաճախող ընդհանուր 16 անձի հետ աշխատանքային կեղծ պայմանագրեր: Այնուհետեւ նա անձամբ հաստատել է կեղծ պայմանագրերը, հրամանագրել է հաստատությունում փաստացի աշխատանքի չհաճախող 16 անձ, որից հետո Արաքս Հովսեփյանի եւ Փառանձեմ Մարտիրոսյանի հետ աշխատավարձի հաշվարկի պաշտոնեական կեղծ փաստաթղթեր: Դպրոցի այս երեք աշխատակիցները ելքագրել են 36 մլն 370 հազար ՀՀ դրամ:
