Թուրք-ամերիկյան հարաբերությունների վատթարացումը Հայաստանը եւ Սփյուռքը պետք օգտագործեն ցեղասպանության հարցի ակտիվացման եւ սրացման միջոցով։ Այդ մասին այսօր՝ հոկտեմբերի 10-ին, «Հայ-թուրքական հարաբերությունները արձանագրությունների ստորագրումից առաջ եւ հետո» թեմայով քննարկման ժամանակ նշել է Գլոբալիզացիայի եւ տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանը:
«Ո՞վ էր պատկերացնում, որ Գերմանիան կճանաչի Ցեղասպանությունը։ Պետք չէ պնդել, որ Ամերիկան պատրաստ չէ ճանաչել Ցեղասպանությունը, ավելին Ցեղասպանության ճանաչումը շատ մոտ է»,-ընդգծում է նա։
Նրա խոսքով, թուրքական իշխանությունները ուզում են կենտրոնացնել ամբողջ իշխանությունն իր ձեռքում, քանի որ երկրի ներսում եւս լուրջ խնդիրներ կան ընդդիմության եւ հասարակության հետ։
«Մի քանի օր առաջ, երբ Թուրքիայի պաշտպանության նախարարը Ադրբեջանում հայտարարեց, որ Ղարաբաղի հարցում ցանկացած հրաման կկատարենք, միգուցե նա մոռացել էր, որ ինքը Թուրքիայի պաշտպանության նախարարն է»,-ասաց նա։
Իր խոսքի վերջում նա նշեց, որ հայ-թուրքական արձանագրություններից պետք է դուրս գալ, քանի որ Թուրքիան շահարկում է դրանք, իսկ արձանագրությունները առ ոչինչ հայտարարելը ճիշտ է։
«Ընդ որում, Սերժ Սարգսյանը սկսեց, ինքն էլ պիտի փակի։ Քանի դեռ Թուրքիան պատրաստ չէ կառուցողական հարաբերությունների, նշանակում է, որ պետք է կիրառել ավանդական մեթոդը, աշխատել աշխարհի հետ, որ ճնշեն Թուրքիային»,-ընդգծեց Ստեփան Գրիգորյանը:
