Ժամանակն է կիրառել հստակ սանկցիաներ ԵԽԽՎ-ում Ադրբեջանի պատվիրակության նկատմամբ: Այս մասին, այսօր՝ հոկտեմբերի 10-ին, Եվրոպայի խորհրդի խորհրդարանական վեհաժողովի աշնանային նստաշրջանի լիագումար նիստում իր ելույթում նշել է հայկական պատվիրակության ներկայացուցիչ, ՀՀ ԱԺ նախագահի տեղակալ Միքայել Մելքումյանը:
Նա, ամսնավորապես, նշել է.
«Միանշանակ, Տնտեսական համագործակցության եւ զարգացման կազմակերպության գործունեությունը եւ աջակցությունը տարբեր երկրներում, այդ թվում` Հայաստանի Հանրապետությունում եւ տարածաշրջանում խիստ կարեւոր է: Հատկապես փորձագիտական մակարդակով ներկայացվող բարձրամակարդակ մասնագետները լրջագույն աջակցություն են ցուցաբերում տարբեր երկրներում:
Սակայն, որպեսզի այդ աջակցությունը լինի առավել արդյունավետ եւ նպատակային, անհրաժեշտ է, որ նաեւ տվյալ տարածաշրջանում լինի կայունություն եւ ժողովրդավարություն: Դա, ինչ խոսք, չի կարելի ասել Ադրբեջանի մասին, որտեղ պետական կառավարչական համակարգը խիստ կոռումպացված է, եւ նաեւ կոռուպցիան իր նոր դրսեւորումներով արտահանվում է դեպի Եվրոպա եւ այլ երկրներ: Այսպիով՝ նա արտահանում է յուրօրինակ մի ծառայություն, որը խաթարում է տարբեր միջազգային կառույցներումնորմալ կյանքը, որոշումներ ընդունելու ինստիտուտները փոշիանում են, կորում է վստահությունը միջազգային կառույցների նկատմամբ:
Ուստի շատ հստակ ասում եմ, քանի որ փաստերը բազմաթիվ են եւ տարբեր, նաեւ հայտնի հեղինակավոր լրատվամիջոցներում, որտեղ նույնիսկ կոնկրետ կաշառքի չափն է նշված, թե որքան, ում, ուստի ժամանակն է կիրառել հստակ սանկցիաներ այդ երկրի եւ նրա այստեղ գտնվող պատվիրակության նկատամամբ:
Կարծում եմ, մենք պետք է գնանք իրական սկզբունքայնության ճանապարհով, եթե ոչ, ապա դրա հետեւանքները անդառնալի են: Թողնենք դիվանագիտական նրբերանգները, պետք է խոսել պարզ, մարդկային լեզվով:
Պարզ է, չէ՞, որ նավթի գինը իջավ եւ Ադրբեջանի տնտեսությունը եւ հանրային կյանքը հայտնվել են ծանր, նաեւ կաթվածահար վիճակում: Ջանքերը՝ իրավիճակը փոխելու համար որեւէ արդյունք չեն տալիս եւ չեն տալու: Տնտեսական եւ ֆինանսական օժանդակությունը պետք է լինի միջազգային խաղի կանոններին համապատասխան, մարդու տարրական իրավունքներին համարժեք, ժողովրդավարական նորմերը պահպանող երկրներում:
Իսկ ի՞նչ է կատարվում Ադրբեջանում, որտեղ նույնիսկ հարեւան երկրից լրագրող են առեւանգումը եւ ներմուծում սեփական երկիր՝ բռնությունների ենթարկելու համար:Եվ երկրի վարկանիշը միջազգային տարբեր ատյաններում պահելու համար ահռելի ֆինանսական միջոցներ են ծախսում՝ տարբեր պաշտոնյաներին կաշառելու համար: Չի կարող պատահել, որ միջազգային հեղինակավոր այնպիսի պարբերականներ, ինչպիսիք են Գարդիանը եւ այլն, այդքան ապատեղեկատվություն տարածեն: Ինչպես ասում են՝ծուխը առանց կրակի չի լինում»:
