Եվրամիությունը որոշել է ընդլայնել Հյուսիսային Կորեայի դեմ պատժամիջոցները՝ սեպտեմբերի 11-ին ՄԱԿ ԱԽ ընդունած բանաձեւերին համապատասխան։ Այս մասին ասված է ԵՄ Խորհրդի հայտարարության մեջ, որը երեքշաբթի տարածել էր Բրյուսելը, փոխանցում է ՏԱՍՍ–ը։
«Խորհուրդը նորից ընդլայնել է Հյուսիսային Կորեայի դեմ պատժամիջոցները՝ համաձայն ՄԱԿ ԱԽ 2375 բանաձեւի»։
Փաստաթղթում ասվում է, որ նոր պատժամիջոցներով նախատեսվում է արգելք սահմանել Հյուսիսային Կորեային խտացրած բնական գազ վաճառելու, Հյուսիսային Կորեայից կտորների ներմուծման, ինչպես նաեւ նավթի եւ վերամշակված նավթամքերքի արտահանման վրա։ Բացի այդ, անդամ երկրները Հյուսիսային Կորեայի քաղաքացիներին աշխատանքի թույլտվություն չեն տա իրենց տարածքում, քանի որ նրանց եկամուտը կարող է օգտագործվել երկրի անօրինական միջուկային եւ հրթիռային ծրագրերի աջակցության նպատակով։
