ՄԱԿ-ը Հյուսիսային Կորեայի դեմ կիրառված ներմուծման եւ արտահանման պատժամիջոցները խախտող չորս նավերի արգելել է աշխարհի ցանկացած նավահանգիստ մտնել, հաղորդում է «Ամերիկայի ձայն»-ը:
ՄԱԿ պատժամիջոցների կատարման հանձնաժողովի պատասխանատու Հյու Գրիֆիթսն այս մասին հայտարարել է երկուշաբթի՝ Նյու Յորքում կայացած ճեպազրույցի ժամանակ: Նրա խոսքով՝ արգելքն ուժի մեջ է մտել անցյալ հինգշաբթի:
Ըստ տվյալների՝ արգելքը վերաբերում է Petrel 8, Hao Fan 6, Tong San 2 եւ Jie Shun նավերին:
ՄԱԿ Անվտանգության խորհուրդը օգոստոսին բանաձեւ է ընդունել, որն արգելում է Հյուսիսային Կորեային ածուխ, հանքաքար եւ ծովամթերք արտահանել՝ ի պատասխան Փհենյանի կողմից միջմայրցամաքային բալիստիկ հրթիռի հաջող փորձարկմանը: ԿԺԴՀ-ում վեցերորդ միջուկային փորձարկումից հետո սեպտեմբերին ընդունվեց պատժամիջոցների հերթական փուլը: